Сәрсен Аманжолов атындағы Шығыс Қазақстан университетінің құрметті профессоры, тарих ғылымдарының кандидаты, ЖАК доценті Иван Аникеевич Полтаранин дүниеден өтті. Ол университетте 50 жылдан астам еңбек етіп, мыңдаған білікті тарихшы мамандарды тәрбиелеп шығарған Ұлы ұстаз, көрнекті ғалым еді.
Полтаранин Иван Аникеевич 1939 жылы 25 қаңтарда Шығыс Қазақстан облысы Шемонаиха ауданының Верх-Уба ауылында дүниеге келген. Өскемен педагогикалық институтында қызмет етіп, оқытушылықтан бастап кафедра меңгерушісі және тарих факультетінің деканы лауазымдарына дейін жетті. Оның студенттері шетелдердің жаңа тарихы және халықаралық қатынастар дәрістерін ерекше ықыласпен еске алады.
Өзінің кәсіби жолында ол көптеген ғылыми мақалалар мен еңбектер жариялады. ШҚО тарихының сарапшысы ретінде аймақ тарихын насихаттауда үлкен үлес қосып, журналистермен тығыз жұмыс істеді. Әлеуметтік желілерде белсенділік танытып, тарихты халыққа жақындата білді.
Иван Аникеевич – Қазақстан білім беру ісінің үздігі, бірнеше рет үкіметтік және министрлік марапаттарға ие болған. Ол университет қабырғасында «бірлік пен татулықты» дәріптейтін тұлға ретінде кейінгі ұрпақ жадында мәңгі сақталады.
Сәрсен Аманжолов атындағы Шығыс Қазақстан университеті ұжымы мен студенттері Иван Аникеевичтің отбасына, жақындарына қайғырып көңіл айтады. Оның жарқын бейнесі мен еткен еңбегі келешек ұрпаққа үлгі болмақ.
"Асқар тау әке, абзал атаның есімі университет қабырғасында мәңгі сақталады", – делінген ұжымның көңіл айтуында.