Қазақстанда жаңадан құрылған ІІМ-ге қарасты департамент немен айналысады?
Қазақстанда киберқылмысқа қарсы күрес департаменті құрылды.
Мемлекет басшысының киберқылмысқа қарсы күресті күшейту туралы тапсырмасын орындау аясында Қазақстанның Ішкі істер министрлігінде (ІІМ) жаңа профильдік департамент – киберқылмысқа қарсы іс-қимыл департаменті құрылды.
ІІМ мәліметінше, жаңа департамент киберқылмыстарды анықтау мен ашумен қатар, олармен күресу бойынша стратегиялық қадамдарды әзірлеумен айналысады. Ішкі істер министрі Ержан Саденовтың айтуынша, технологиялардың қарқынды дамуы мен интернет-қатерлердің көбеюі жағдайында осындай мамандандырылған құрылымның болуы заман талабына сай тиімді жауап қатуға мүмкіндік береді.
«Қазіргі заманғы технологиялар дамып, интернет-қатерлер көбейген жағдайда арнайы департамент құру қазіргі уақыттың талаптарына сәйкес тиімді жауап беруге мүмкіндік береді», – деп атап өтті Ержан Саденов.
Киберқылмысқа қарсы күрес департаментінің басшысы болып, осы салада мол тәжірибесі бар полиция полковнигі Жандос Сүйінбай тағайындалды.
Бұған дейін Қазақстанда жаңа полиция бөлімдерінің құрылғаны туралы хабарланған болатын. Бұл шешім Үкімет тарапынан бекітілген тиісті қаулы негізінде қабылданды.
Департаменттің міндеттері
Жаңа департаменттің құрылуы Қазақстандағы киберқауіпсіздік саласындағы шаралардың арта түсуіне ықпал етеді. Киберқылмыстарға қарсы күрес бүгінде өзекті мәселелердің бірі болып табылады, себебі интернет арқылы жасалатын қылмыстар саны жыл сайын өсуде. Қазақстандықтар арасында интернет алаяқтық, жеке мәліметтерді ұрлау және зиянды бағдарламалар арқылы шабуыл жасау жағдайлары жиі кездесуде.
Жаңа департамент еліміздің қауіпсіздігін қамтамасыз етуде маңызды рөл атқарып, киберқауіп-қатерлердің алдын алу, азаматтардың жеке және қаржылық мәліметтерін қорғау, сондай-ақ интернет-алаяқтықпен күресу бойынша кешенді жұмыстар жүргізеді.