Өзбек президентінің экс-баспасөз хатшысына Тәшкенде оқ атыпты
Оқиғаға қатысты "Қасақана өлтіруге оқталу" бабы бойынша қылмыстық іс қозғалған
26 қазанға қараған түні Өзбекстанның Ташкент облысы Кибрай ауданында белгісіз біреулер Range Rover көлігіне бірнеше рет оқ атқан,- деп хабарлайды newsroom.kz
Деректерге сүйенсек, көлікте Өзбекстан президент әкімшілігінің бұрынғы өкілі, президенттің бұрынғы баспасөз хатшысы Комил Алламжонов пен оның жүргізушісі болған. Екеуі де зардап шекпеген деп айтылады.
Оқиғаға қатысты "Қасақана өлтіруге оқталу" бабы бойынша қылмыстық іс қозғалған.
"26 қазанда сағат 1:40 шамасында Ташкент облысы Қибрай ауданындағы Ифор көшесінде белгісіз екі адам жүргізуші Range Rover көлігіне бірнеше рет оқ атып, ізінше жасырынып үлгерген",- деп хабарлады Өзбекстан бас прокуратурасының баспасөз қызметі.
Аймақта жедел-іздестіру жұмыстары жүріп жатқаны хабарланды.
Кибрай ауданында тұратын тұрғындардың бірі атыс болған орында төтенше жағдай режимі енгізілгенін хабарлады. Оның сөзінше, оқиға орнына ішкі істер органдарының нөмірі бар көп көлік келген, кейбір көшелер жабылған.
"Мотоцикл айдаған екі белгісіз адам жолдың бойында тасада тұрып Алламжоновтың көлігін тосқан, ізінше бес рет Макаров тапаншасынан оқ атқан, артынша жасырынып үлгерген. Алламжонов пен оның жүргізушісі зардап шекпеген, бірақ көлікте оқ іздері қалған. Қазір барлық камералардан жазбалар алынып, шабуылдаушылардың аты-жөні анықталып жатыр",- деді Өзбек қызметінің дереккөзі.
Комил Алламжонов қыркүйектің соңында президент әкімшілігінен кеткенмен ол әлі де президент Мирзияев командасындағы адамдардың бірі саналады деді дереккөз.