Жамбыл облысында түнгі рейд кезінде 190 кг қарасора тәркілеген
Күдіктінің үстінен қылмыстық іс қозғалды
Жамбыл облысының құмды аймақтарында түнгі рейд кезінде 190 кг қарасора тәркіленді, – деп хабарлайды newsroom.kz
“Қарасора – 2024” республикалық арнайы операциясы аяқталуға жақындады. Еліміздің оңтүстік аймақтарында полиция қызметкерлері тәулік бойы құмды жерлерді тексеріп, есірткі дайындаушыларды анықтайды.
– Есірткі күресуші сақшылар Ұлттық ұланның “Бүркіт” арнайы бөлінісімен бірлесіп, шалғай аудандарды жаяу патрульдеуге шығады, – деді ведомствода.
Сараптама тәркіленген өсімдіктің қарасора екенін көрсетті. Оның жалпы салмағы 188 келіден асқан. “Қарасора – 2024” арнайы операциясы кезінде полицейлер барлығы 597 есірткі қылмысының жолын кесті, оның ішінде 178 өткізу фактісі, 113 есірткі сақтау фактісі бар.
Полиция мәліметінше, заңсыз айналымнан 16 тоннадан астам есірткі тәркіленді, оның ішінде 13 тонна кептірілген марихуана, 3,6 тонна прекурсор, 83 кг синтетика, 48 кг гашиш, 20 мыңға жуық қарасора бұталары, 76 апиын көкнәр бұталары бар.
Айта кетелік, Күдікті уақытша ұстау изоляторына қамалды. Қылмыстық кодекстің 296-бабы 4-бөлігі бойынша қылмыстық іс қозғалды. Жеті жылға дейін бас бостандығынан айыру жазасы қарастырылады.