Оралда мұғалімді өлтірген күдікті ұсталды
Күдікті бұрын сотталған боп шықты
Оралда полицейлер бастауыш сынып мұғалімін өлтірді деген күдіктіні дереу ұстады, - деп хабарлайды newsroom.kz Батыс Қазақстан облысы полиция департаментінің баспасөз қызметіне сілтеме жасап.
25 сәуірде жүргізілген жедел-іздестіру шараларының барысында ер адам анықталып, ұсталды. Күдікті бұрын сотталған Орал тұрғыны болып шықты.
"Қазіргі уақытта күдікті соттың санкциясымен қамауда отыр, тергеу мүддесі үшін басқа мәліметтер жарияланбайды", - делінген ведомство хабарламасында.
Еске салайық, 25 сәуірде Оралда бастауыш сынып мұғалімі Надежда Никитинаны өз пәтерінде өлтіріп кеткен. 1964 жылы туған мұғалімнің мәйіті оның тұрғылықты жерінен табылды, онда зорлық-зомбылық белгілері болған. Надежда Никитина 35 жыл бір мектепте жұмыс істеген.