8 жыл күткен: Астанада бірқатар тұрғын үй кешені орталық газбен жабдықтауға ауыстырылды

Астанада қаланы газдандыру аясында құрылыс аяқталып, қаланың «газ шеңберін» кезең-кезеңімен іске қосу басталды,- деп хабарлайды newsroom.kz порталы елорда әкімдігінің ресми сайтына сілтеме жасап.

Бұл жоба қала тұтынушыларын сенімді газбен қамтамасыз етуге мүмкіндік береді. Сондай-ақ жоба «Тұран», «Оңтүстік-Шығыс» газ жылу стансаларына, Үркер (Ильинка), Пригородный, Өндіріс, Кирпичный елді мекендеріне жоғары қысымды желілерді қосуды қамтамасыз етті.

Жобаны іске асырудың арқасында автономды қазандықтардан орталық газбен жабдықтауға «Будапешт»,  Cosmic City ,  Family Town  көппәтерлі тұрғын үй кешендері қосылды. Сол сияқты жақын арада «Куршевель» тұрғын үй кешені қосылады. Бұл үйлердің тұрғындары тұрғын үй кешенін орталық газбен жабдықтауға көшіру туралы қала әкімдігіне бірнеше рет өтініш білдірген. Табиғи газды пайдалану тұрғындардың жылу ақысын айтарлықтай азайтады, сондай-ақ сұйытылған мұнай газымен қамтамасыз етуде туындаған проблемаларды шешеді.

Биылғы күзде «Оңтүстік-Шығыс» газ жылу стансасының құрылысы, «Тұран» стансасының бірінші кезегі, құрылысы ұзаққа созылған ЖЭО-3-тің бірінші кезегі аяқталды. Жылумен қамтитын үш нысанның қуаты – 1 140 Гкал/сағ. Осылайша, биылғы жылыту маусымында қалада жылу профициті байқалады.

Келесі жылы бірінші кезекте «Телман» газ жылу стансасын және екінші кезекте «Тұран» газ жылу стансасын пайдалануға беру жоспарланып отыр. Бұл қаланы тағы 850 Гкал/сағ жылу қуатымен қамтамасыз етуге мүмкіндік береді.