Түркістан: Арыста сәні мен сәулеті жарасқан зәулім мешіт ашылды
Бір мезетте 2000 адам құлшылық жасай алатын ғибадатхананың ашылу салтанатына Қазақстан мұсылмандары діни басқармасының төрағасы, бас мүфти Наурызбай қажы Тағанұлы, Арыс қаласының әкімі Гүлжан Құрманбекова, мешіт салуға атсалысқан кәсіпкерлер мен тұрғындар және қадірлі қонақтар қатысты, деп хабарлайды newsroom.kz.
Салтанатты жиын ҚМДБ-ның төрағасы, бас мүфтидің бұйрығымен жаңа мешіттің имамы болып тағайындалған Берік Үйсінбаев қасиетті Құран Кәрімді тиләуат етуімен басталды.
Бұдан кейін, еліміздің бас мүфтиі Наурызбай қажы Тағанұлы құттықтау сөз сөйлеп, жаңа мешітке құран кітап сыйлады.
Қала әкімі Гүлжан Құрманбекова мешіттің салынуына үлес қосқан азаматтар мен кәсіпкерлердің ұйымшылдық көрсетіп, аз уақытта мешітті тапсырып отырғанына алғыс айтты. Мешіт жастарға имани тәрбие беріп, асыл дінімізді насихаттайтын құтты мекенге айналады деп сенім білдірді.
Айта кетейік, жаңа мешіттің мінәжат залы 1500 шаршы метрді құрайды. Құрылыс сәулеті ұлттық нақышпен көмкерілген. Қала іргесінде, тоғыз жолдың торабында орналасқан ғибадатханаға әрқайсысы биіктігі 33 метр болатын төрт мұнарасы, үлкенді-кішілі 17 күмбезі орнатылған. Үш қабаттан тұратын мешітте бір мезетте 2 мың адам құлшылық ете алады. Мұнда конференция залы, кітапханасы, дәрісханалар, бір үлкен әйелдер залы, неке және имамдар бөлмесі бар. Сонымен қатар 100 автокөлікке арналған автотұраққа орын бөлінген. Мешіт аумағында 150 кісіге арналған асханасы да қарастырылған. Жаңа мешітке діни басқарманың шешімімен «Хәзірет Әбу Бәкір әс-Сыддық» атауы берілді.
Мешітті жаңа кілеммен жабдықтауға және осы мешіттің салынуына бас демеуші болған танымал блогер, психолог Балқия Балтабай атсалысқан. Ол салмағы 9 тоннаға жуық болатын, өте сапалы, қой жүнінен тоқылған кілемді өз қаржысына Түркиядан арнайы алдырып, сыйға тартты.
Жаңа мешіт жанынан 300 балаға арналған «Әз Тәуке хан» қарилар дайындау орталығы (жатақханасымен), спорт кешені, тәлім беруші ұстаздарға арналған 6 қызметтік үй мен адал мейрамхана, сондай-ақ 300 орындық қыздар медресесі орналасқан.
Түркістан облысы әкімінің баспасөз қызметі