Сайрам: «мобилография» кәсібі ашылды

Сайрам ауданының білім бөлімінің «Оқу-өндірістік комбинаты» КММ-де заман ағымына және еңбек нарығында сұранысқа ие заманауи кәсіптер туралы ақпарат беру, жастарды сол кәсіп түрлеріне баулу, үйрету мақсатында аудандық білім бөлімінің келісімімен биылғы оқу жылында «Мобилография» кәсібі ашылып, қызуғушылығы мен қабілетін және оқушылардың бейіні ескеріле отырып алғашқы топ құрылды. Бұрын адамдар фотоаппарат көмегіне жүгінсе, бүгінде телефон арқылы әр сәтті өздері таспалай береді. Бұл салаға деген сұраныс әсіресе, жас буын арасында айтарлықтай жоғары, деп хабарлайды newsroom.kz.

Мобилография тарихына тоқтала кетейік. Бұл әрине, камералармен жабдықталған технологияның таралуына байланысты болды.

Ұялы фонографияның бастаушысы – ломография. Ломографияға деген қызығушылық 1993 жылдан бері пайда болған. Дәл осы жылдары Ленинградтың оптикалық-механикалық қауымдастығы арзан және ыңғайлы камераны ойлап шығарды. «LOMO-Compact» деп аталатын бұл камераның бағасы шамамен  10$ болды.

Аппарат Вена өнер академиясының студенттерінің арқасында танымал болды. Олар Прага қаласына барып жолда кездескен қызықты ескерткіштерді суретке түсірген. Бірнеше ракурстарды қамтып түсірген фотосуреттерінің арқасында бірнеше күнде осы камера жоғары сұранысқа ие болған.

Ал «Мобилография» терминінің авторы — ресейлік суретші Дмитрий Резван. 2004 жылы Дүниежүзілік мобилографтар қоғамы құрылған. Ол «Әлемнің мобилограммасын құру және әлемде мобилографияны тарату» міндетін негіздеді.

Цифрлық технологияның пайда болуымен мобилография қатар дамыды. Цифрлық технологияның пайда болуымен фототаспаға деген қызығушылық бәсеңдеді. 2002 жылы Ұлыбритания астанасында мобильді құрылғыларда түсірілген фотолар көрсетілген алғашқы көрме өтті.

Содан кейін мобильді фотография жанры біртіндеп өте кең танымалдылыққа ие бола бастады.

Көп адамдар мобилографияны әуесқой фотографияның сәні болып табылатын өнер түрі  деп қабылдамайды. Алайда, техникалық құралдарды жетілдіргеннен кейін жанр түп-тамырымен қалыптасады және жоғары ажыратымдылықтағы бейне жазбаларды компьютерлік өңдеу арқылы мобилограммалар жасалады деген пікір бар. Бірақ мобилділіктің қазіргі дамуымен өнердің бұл түрі оқшауланғандығын ескерген жөн, өйткені мобилография негізінен суреттің сапасын емес, суреттің тақырыбын және ерекше нүктесін бағалайды.

Мобилография әлемнің түкпір-түкпірінде тұратын, әртүрлі тілдерде сөйлейтін адамдар арасындағы байланыс құралы ретінде өте маңызды. Суретке түсірген адам өз эмоцияларын, сезімдерін, көңіл-күйлерін жеткізуге тырысады.

Алайда,  әзірге көптеген адамдар бұл жанрға күмәнмен қарап, өнер деп есептемейді.Соған қарамастан, техникалық құралдар жетілдірілуде, мобильді фотографияға арналған құрылғылардағы камералардың сапасы жақсаруда, жақында тіпті жоғары сапалы бейне жазбалар жасауға болады.

Бүгінде әлеуметтік желілерді белсенді қолданатын жастар өздерінің профильдерінде жағымды әсер қалдыру мақсатында айрықша фотосуреттерді түсіріп, оны өңдеуді үйренуде. Дегенмен, кәсіби жабдықпен түсіру және монтаждау көп уақытты қажет етеді. Сол себепті, сапалы суретті күнделікті қолымызда жүретін смартфонармен түсіру оңай болмақ.

Мобилографтардың кәсіби мамандардан артықшылығы материалды жылдам беруінде.

Мықты мобилограф болу үшін ең алдымен сапалы видеоролик жасап шығаруға камерасы жақсы жабдықталған смартфон, күшейтілген жарық пен дыбыс қажет. Ал, ағайы оқушыларға суретті түсіру және оларды монтаждауды үйрету жұмысымен қызу айналысуда.

Көздің жауын алатындай кадрларды ұстап, смартфонға түсіру арқылы оған өзгеше реңк беру екінің бірінің қолынан келе бермейтін дүние.

Осы орайда, кәсіп оқушыларының алғашқы жасаған жұмыстарымен бөлісуді жөн санап отырмыз.

Қазақстанда да әлемдік ірі брендтермен жұмыс жасап жүрген немесе өз аудиториясына ерекше кадрлар жасаудың сырымен бөлісіп жүрген  мобилографтар бар. Солардың бірі ең танымал фото/видеограф Қыран Талапбек(қазіргі таңда «Мобилография» курсын 3000-ға жуық адам сатып алып, оқыған) «Lexus», «Toyota», «LG» брендтерінің жарнамасын ұялы телефонға түсірумен айналысады. Демек, бұл саламен үздіксіз айналысып, дамып отырса, биік шыңдарды бағындыруға болады.

Мобилографияны кез келген адам меңгере алады. Тек көп тәжірибе мен шыдам қажет. Түсірген фото мен видеода мағына болуы, ұялшақтықты жеңу, идеяны дамыту, ерекше болуға тырысу-өзін-өзі жеңіп, соңына дейін баратын адамдардың ғана қолынан келеді. Түсірген дүниеңді көркемдеп өңдеу үшін меңгеру қажет бағдарламалар саны да өте көп. Саяхаттағанда да, маңызды іс-шараға қатысқанда да, күнделікті жұмыс күнінде де бұл саланы білу артық етпейді. Тез және талғаммен суретке түсіруді мобилографтардан үйрену қажет.