Тұрар Рысқұлов ізімен: түркістандық жастар неміс университетінде оқымақ

Түркістан облысы әкімінің орынбасары Бейсен Тәжібаев Түркістанға арнайы жұмыс сапарымен келген Қазақстан-Неміс университетінің (die Deutsch-Kasachische Universität) президенті, профессор ғылым докторы Вольрад Роммельпен кездесті,- деп хабарлайды newsroom.kz порталы.

Онда Түркістанда аталған университетті ашу ұсынысы мен алғышарттары талқыланды.

-Қасиетті Түркістан қаласына қош келдіңіз! Қазақстан мен Германия арасындағы білім саласы бойынша бітімгершілік пен серіктестің нәтижесінде қол жеткізген жетістіктермен таныспыз. Оның ішінде Қазақстан-Неміс университетінің құрылуы – білім жүйесіне жаңашылдық алып келді. Хабардар боларсыз, Түркістан облысының құрылғанына бес жыл толды. Өңірде 2 милионнан астам тұрғын бар. Орташа есеппен 32 мың түлек мектеп бітірді. Бұл тұрғыда облысымыз республикада бірінші орында. Екі университет жұмыс істейді. Дегенмен жоғары оқу орындарын ашу идеяларын қолдаймыз.Сіздермен бірге жұмысшы топ қажетті шараларды ұйымдастыруға әзірміз, - деді Бейсен Дәулетұлы.

Сондай-ақ, облыс әкімінің орынбасары өңір халқының 80 пайызы ауылдарда тұратынын жеткізді.

-Бірінші кезекте аграрлы салада мамандар даярлау өзекті. ІТ саласында кадрларға сұраныс жоғары. Соңғы бес жылда Түркістан облысында бірқатар шетелдік университеттер және институттардан филиалдар ашу туралы ұсыныстар келіп түсіп, бүгінде келісімдер жүргізілуде. Ғимарат салу уақытты қажет ететіндіктен, колледж нысандарында бастауға мүмкіндік бар. Тиісті бюджет есебінен студенттерге оқу гранттары қарастырылады,- деді облыс әкімінің орынбасары.

Кездесуде Вольрад Роммель екі ел Үкіметтері арасындағы университетті дамыту жөніндегі келісім негізге алынатынын айтты. Аталған университет ғылым мен білім көкжиегін кеңейтуге қауқарлы, әрі жаңа технологиялармен қамтылған көрінеді. Сапар аясында облыстық жауапты басқарма өкілдерімен бірге Кентау Көпсалалы колледжіне барып, ондағы жұмыспен танысты.

Айта кетейік, Қазақстан-Неміс Университеті 1999 жылы неміс стандарттары аясында мамандар даярлау мақсатында құрылған. ҚР БжҒМ аттестациясынан, ҚНУ НКАОКО агенттігі және ACQUIN (Германия) аккредитациялаудан өтіп, сертификаттау және сапаны қамтамасыз ету институты аккредитациясына қол жеткізген.

Оқырман назарына ұсынып, тарихқа үңілсек, 1922 жылы Түркістан мен Бұхарадан Германияға студенттер жіберу қолға алынған. Осы бағдарлама аясында ұлт қайраткері Т.Рысқұлов Түркістан Автономиялы республикасы үкіметінің басшысы ретінде 1923 жылдың күзінде Германияға сапармен барған.