Сұмдық! Түркістанда студент, 7 сынып оқушысын бірнеше рет зорлаған
Жәбір көрген қыздың анасы жантүршігерлік ақпараттармен бөлісті
Түркістан облысына қарасты Сайрам ауданында студент, 7 сынып оқушысын бірнеше рет зорлады деген күдікке ілінді,- деп хабарлайды newsroom.kz порталы otyrar.kz-ке сілтеме жасап.
Оқушы қыздың айтуынша, қорқынышты оқиғаның бәрі 2022 жылы басталған. Колледж студенті пышақпен қорқытып, кәмелетке толмаған қызды жыныстық қатынасқа мәжбүрлеген.
Қыздың анасы, бұл сұмдық оқиға жайында бір жылдан кейін ғана білген. Осы уақытқа дейін қыз үнсіз келген.
"Бұл өз еркімен болған нәрсе емес, ол қызымды пышақпен қорқытты. Әр жолы қорқытып, денесін кесіп отырған. Ол қызымды бопсалап: "айтқанымды орындамасаң, ата-анаңды өлтіремін" деген. Ол түнгі сағат 2-3-те үйге бірнеше рет келіп, оны үйден қорқытып шығарып алған екен. Біз бұл жағдайдан хабардар болмадық. Қызымнан "келісіммен болды ма?" деп сұрадым, қызым: "Ол мені алдап алып кетті, серуендейміз деп, іс жүзінде пышақпен қорқытып, зорлады" деді, - дейді қыздың анасы.
Қыздың ата-анасы әділдікке жеткісі келеді. Жәбірленуші тараптың адвокатының айтуынша, облыстық прокуратура да бұл іске назар аудармай отыр.
"Бұл жағдай бойынша бірнеше сараптама қорытындысын алдық. Жәбірленуші тараптан дәлел ретінде хат-хабарлар, суреттер мен аудиожазбалар ұсынылды. Алайда тергеу мен прокуратура бұған көз жұмып отыр", - дейді адвокат Тимур Сәрсенәлиев.