Президент: “Ұлттық құрылтай-сән-салтанатпен өткізетін той емес”

  Президент Қасым-Жомарт Тоқаевтың қатысуымен Ұлттық құрылтай басталды. Құрылтайда сөз сөйлеген Мемлекет басшысы Абай облысында болған өрт кезінде қайтыс болғандар туралы айтты, деп хабарлайды newsroom.kz Ақорданың ресми сайтына сілтеме жасап. “Сөз басында бірден атап өтейін, меніңше, Ұлттық құрылтай бұл – арқаны кеңге салып отыратын жиын емес. Сән-салтанатпен өткізетін той да емес. Бабаларымыз маңызды шешім қабылдар кезде немесе елге қатер төнген сын сағатта құрылтай шақырған. Бүгінгі құрылтайдың отырысы еліміздегі қайғылы оқиғадан кейін өтіп жатыр. Абай облысында алапат өрт шығып, азаматтарымыз қаза тапты. Тағы да қайталап айтқым келеді: біз мұндай оқиғадан сабақ алуымыз керек, нақты шешімдер қабылдауымыз қажет. Ел басына түскен қиындықтар, ең алдымен, біздің береке-бірлігімізді сынға салады. Осындай күрделі сәттер, ең бастысы – шынайы жанашырлық және терең жауапкершілік таныту қажет екенін айқын көрсетеді. Мұны өздеріңіз өте жақсы түсініп отырсыздар!”-деді президент.