"Ауыл" партиясының депутаты: блогер санап жүргендер блогтың не екенін түсінбейді

  “Қазір өзін блогермін деп жүргендердің дені – ақпараттың рас-өтірігін тексермей, оңай жолмен баю мақсатында кез келген адамға жала жабудан тайынбайды. Бопсалап ақша табатын, атаққұмар, елдің берекесін бұзып, қауіпсіздігіне қатер төндіретін сауатсыз адамдар”,- деген мәжіліс депутаты Анас Баққожаев премьер-министр мен Бас прокурорға депутаттық сауалын жолдады, деп хабарлайды newsroom.kz. “Өзін блогер санап жүргендердің басым бөлігі шын мәнінде блогтың не екенін түсінбейді. Көпшілігі ел алдындағы беделін, атақ-дәрежесін пайдаланып, халыққа көмек жасап жатқандай сыңай танытып, әлеуметтік желілерде түрлі «хайп» ұйымдастырып әлек. Дәл осы блогерлер талай жылдан бері ұмыт болған қаржылық пирамиданың жандануына да себеп болғанын бәріміз жақсы білеміз. Сол алаяқтарға сеніп қалған қаншама адам суицид жасады, қаншауы денсаулығынан айрылды, тағы қаншамасы үйсіз-күйсіз қалып, қаңғырып кетті?! Олардың обалы кімге?Елде болып жатқан түрлі әлеуметтік жағдайларды өз ыңғайына бұрмалап, оған ұлтаралық рең беріп, елге жалған ақпарат таратқан блогерлердің де ісі майшаммен қаралуы керек еді. Расталмаған қауесеттің әлеуметтік желі арқылы тез тарауынан Қордай оқиғасының немен аяқталғаны бәріңізге мәлім”, – деді депутат Анас Баққожаев. Сондай-ақ ол жастардың блогерлерге еліктеп, оңай ақша тауып, тез байығысы келгісі келетінін айтты. Және мұның бәрі біздегі заңнамада блогер мәртебесі айқындалмағаннан деп есептейді. “Жауапкершіліктің жоқ екенін сезінген мұндай адамдар әрине, ойына келгенін істейді. Әлеуметтік желілерді пайдаланып, азаматтар мен ұйымдардың құқығы мен заңды мүдделеріне зиян келтіретін жалған ақпарат таратқаны үшін оларға қолданылатын шара қарастырылмаған. Сол себепті оларда ешқандай жауапкершілік жоқ. Артын зерттеп, шындық па, жоқ па бастарын қатырмайды. Бастысы шу. Бастысы сөз. Кімнің болмасын алдында тікеңдеп, беттен алып, жеке басына тиіседі. Сөз бостандығы деген осы ма?”-деді Баққожаев мырза. Сонымен қатар мәжілісмен журналист мамандығын қор болып отқанын айтты. Блогерлерден журналистертердің әлдеқайда әдепті екенін, маман иесі, талабы бар мамандық екенін тоқталды. “БАҚ туралы заңды қайта қарап, пысықтап, Мәжілістің ашық талқылауына енгізу қажет. Ақпарат саласындағы жауапкершілікті тек журналистер емес, блогерлер де сезінетін уақыт жетті. Бұл мәселені аталған заң жобасының аясында дереу қарастыруымыз қажет. Себебі жауапкершілікті түсіне алмайтын блогерлердің саны уақыт өткен сайын артуда”, – дейді Анас Баққожаев.