Шаруалардың мәселесі «AMANAT» партиясы жанындағы комитетте талқыланды

Несиелеуге арналған кепілдік базасы, ауыз су тапшылығы және егіс науқанына дайындық. Осы және өзге де өзекті мәселелер «AMANAT» партиясы жанындағы Агроөнеркәсіптік комитет отырысында талқыланды, деп newsroom.kz хабарлайды.

«Оңтүстік өңірдегі шаруалар көктемгі егіс науқанына дайындық жұмысын бастап кетті. Жақын арада өзге аймақтар да іске кіріседі. Бұл ретте, олардың тұқым, жанар-жағармай, техниканы жөндеуге қажет қосалқы бөлшектер сатып алуы үшін тиісті қаражаты болғаны маңызды. Сондықтан пайда болған мәселелерді уақтылы талқылап, оларды Үкімет деңгейінде көтеру қажет», – деді Комитет төрағасы Қайнар Абасов.

Шаруалардың айтуынша, ауыл шаруашылығы саласында ұйымдастырушылық және заңнамалық деңгейдегі мәселелер жетіп-артылады. Мәселен, Батыс Қазақстан облысындағы шаруа қожалығының басшысы Сержан Идиатов майлы дақылдар экспортына квота және лицензия енгізу жоспарланып отырғанына қынжылды.

«Бұл шешім мүлдем дұрыс емес. Егіншіліктің бұл түрі өңір шаруалары үшін негізгі табыс көзі саналады. Біз тиісті органдарға Батыс Қазақстан облысындағы шаруалардың атынан ұжымдық хат жолдадық. Осы мәселені Үкімет деңгейінде көтеруді сұраймыз», – деді ол.

Ал Қостанай облысындағы Андрей Двуреченский есімді кәсіпкер несиелеуге арналған кепілдік базасы мәселесін көтерді.

«Бәрінде бірдей кепілге қоюға болатын мүлік жоқ. Мысалы, 150 миллион теңге несие алу үшін 360 миллион теңгенің кепілі қажет. Бұл айтарлықтай қиындық туғызады. Сонымен қатар, қазір бәрі қымбаттап жатыр. Шаруалардың шығыны артып барады. Сондықтан биыл қажетті қаржыландыру көлеміне қол жеткізе алмау қаупі бар. Егер мұның шешімі қазір табылмаса, өңірдің ауыл шаруашылығында қаржы тапшылығы туындауы мүмкін», – деді ол.

Ал Маңғыстау облысының комитет мүшесі Оңайбек Әбділов су тапшылығы бар өңірде құдық қазуға берілетін субсидияны алып тастау көзделіп отырғанын атап өтті. Оның айтуынша, бұл әрекет былтыр қиын кезеңді бастан өткерген аймақтың агросекторына одан әрі зиян келтіруі мүмкін. Сондай-ақ, ол маңғыстаулық шаруаларды күн панельдерімен қамтамасыз ету жұмысын қайта жаңғырту қажет екенін атап өтті.