100 мыңға жуық отбасы кедейлік жағдайынан шықты

Соңғы екі жылда атаулы әлеуметтік көмек (АӘК) алған 99 мыңнан астам отбасы кедейлік жағдайынан шықты. Бұл туралы ҚР Еңбек және халықты әлеуметтік қорғау министрлігі хабарлады.

«2020 және 2021 жылдары атаулы әлеуметтік көмек алған 99 220 отбасы мемлекеттік қолдау шараларының арқасында кедейлік жағдайынан шықты», - деп мәлімдеді ҚР ЕХӘҚМ әлеуметтік көмек департаментінің директоры Асқар Ниязов брифингте.

2020 жылдан бастап табысы өңірлік ең төменгі күнкөріс деңгейінің 70%-ынан аспайтын азаматтарға тоқсан сайын әлеуметтік көмек тағайындалды. Сондай-ақ табысы аз отбасылардың бір жастан алты жасқа дейінгі балаларына кепілдік берілген әлеуметтік пакет берілуде. Ниязовтың айтуынша, өткен жылы АӘК жалпы сомасы Т65,6 млрд теңгеге 198,4 мың отбасы (990,5 мың адам), биылғы 1 мамырдағы жағдай бойынша Т18,8 млрд теңгеге 111,4 мың отбасы (571,1 мың адам) алды.

«Көмек алушы отбасылар арасында көпбалалы отбасылар саны 40,4% (44 966 көп балалы отбасы) құрайды. Бұл өткен жылдың көрсеткішінен 2,5%-ға жоғары (37,9%)», - деп атап өтті министрлік өкілі. 2021 жылдың қорытындысы бойынша жұмыспен қамту шараларымен шартты атаулы көмек алатын 160,6 мың отбасының 273,4 мың еңбекке қабілетті тұлғаларының ішінен 206,5 мың адам қамтылды.