Өмірзақ Шөкеев ұстаздарды кәсіби мерекесімен құттықтады

04 Қазан, 2019 132 0

Салтанатты шараға өңірдің 400 – ден астам  білім беру саласының өкілдері қатысты.  

Ұрпақ тәрбиелеуде талмай еңбек етіп жүрген ұстаздардың төл мерекесіне арналған «Мерекелеріңізбен, ұлағатты ұстаздар!» атты шараның шымылдығы «Абай өсиеті» театрлық көрінісімен ашылды. Түркістан облысының әкімі Өмірзақ Шөкеев ұстаздар қауымына өз алғысын білдіріп, мерекесімен құттықтады. Аймақ басшысы тұлға болып қалыптасуға ықпал еткен мектеп мұғалімдерін еске алып, оларға деген жылы лебізін білдірді. Елдің ертеңін айқындайтын, оның бәсекелестік қабілетіне ықпал ететін аса маңызды сала майталмандары Түркістан облысы әкімінің «Құрмет грамотасы», Алғыс хатымен марапатталды. Шәкірттерін білім нәрімен сусындатып, жақсы қасиеттерді бойына дарытатын ұстаздарға деген халқымыздың құрметі қашанда ерекше. Жиында «Жастар жылына» орай өткен «Үздік жас мұғалім-2019» облыстық байқауының  жеңімпаздары марапатталды.

«Алдағы уақытта облыстағы «Дарын» мектептерін көбейтеміз. Қараша айында «Дарын» ғылыми – әдістемелік орталығы, 2020 жылы «Оқушылар сарайы» ашылады. Замануи білім ошақтары бой көтеріп, оқушылардың білімге деген құштарлығын арттыруға барлық жағдай жасалады. Мұғалім біліктілігін арттыруды дамыта түсеміз. Біздің өңірден мақтанышпен айта алатын талай мықты маман шығып жатыр. Осы үрдісті жалғастырып, дамытып, күш салуымыз керек», - деді облыс басшысы Өмірзақ Шөкеев.

Бүгінде облыста 60 мыңға жуық педагог еңбек етіп келеді. Былтырғы жылы өңіріміздің 150-ге жуық оқушысы халықаралық және республикалық деңгейдегі білім сайыстарында жүлделі орындарға ие болды. Жақында ғана «Үздік педагог-2019» республикалық байқауына өңірімізден 9 ұстаз қатысып, үшеуі білім сайысының озығы атанды.  Елімізде ұстаздар қауымының төл мерекесі қазан айының алғашқы жексенбісінде атап өтіледі. Салтанатты рәсім әрі қарай ән-күймен, би шашуларымен және театрланған қойылымдармен жалғасты.

Тегтер: Түркістан, ұстаздармерекесі, ӨмірзақШөкеев, құттықтау

Достар! Біздің телеграмма арнамызға жазылыңыздар және соңғы жаңалықтарды бірінші болып біліп отырыңыз. Жаңалықтар Сізге дереу жетеді!

Пікір қалдыру

Пікір жазу үшін сайтқа кіріп, телефон нөмірін растаңыз.