Бауыржан Байбек праймериз туралы: еліміз үшін игі іс болды
ҚР Тұңғыш президенті Нұрсұлтан Назарбаевтың бастамасымен қолға алынған "Nur Otan" партиясының республикалық праймеризі аяқталды, деп хабарлайды Newsroom+ақпарат агенттігі.
Партияішілік праймериз 3 айға созылды. 17 тамыздан бастап 17 қараша аралығында жүрді.
Бұл үш ай үміткерлер үшін де, сол секілді партияның орталық аппаратынан бастап аудандық филиалдарына дейінгі барша қызметкерлері үшін де үміт пен күдікке толы қарбалас сәт болғаны сөзсіз. Осындай ауқымда праймериз өткізу оңайға соқпады. Десе де, партия Лидері мен партияластардың, сондай-ақ Жақтастар Лигасының қолдауының арқасында біз «Nur Otan»-ды «қайта жандандыру» бойынша алға қойылған міндеттерді тиісінше орындап шықтық, деп жазды партия төрағасының бірінші орынбасары Бауыржан Байбек өзінің facebook-тегі парақшасында.
Оның айтуынша, праймериздің ашықтығы мен айқындығы жұрт қызығушылғын оятқан. Бұған дәлел ретінде бірінші кезеңде 662 мыңнан аса адам қатысқанын айтқан. Бұл дегеніміз нұротандықтардың 84%. Жалпы есепте 1,5 миллиондай қазақстандық белсенділік танытып, іс-шараға ат салысқан.
Күні кеше ғана праймериздің үшінші кезеңі аяқталды. «Nur Otan»-ның Қазақстан Республикасы Парламентінің Мәжілісіне арналған партиялық тізіміне 17 өңірден кандидаттар анықталды.Пікірсайыстар қорытындысы бойынша 267 үміткердің ішінен жасырын рейтингтік электронды дауыс беру арқылы 78 адам сайланды.
Оның ішінде 9 кандидат – праймеризге қатысу үшін қатарымызға қосылған партияның жаңа мүшелері. Партиялық тізімге Мәжілістің қызметтегі депутаттарынан 5 адам енді.
Партиялық тізімнің үштен біріне жуығын әйелдер құраса, ал 12 кандидат – 35 жасқа дейінгі жастар. Жеңімпаздардың орташа жасы – 47 жас. Олардың 27%-ті - шағын және орта бизнес өкілдері, 24,5%-ті - экономистер, 11,5%-ті - заңгерлер, ал 6 кандидаттың ғылыми дәрежесі бар. Әсіресе, өнеркәсіп, мемлекеттік басқару, білім, денсаулық сақтау, сондай-ақ үкіметтік емес сектордың өкілдері басымдыққа ие.
Бауыржан Байбек праймеризде топ жарғандарды құттықтап, Елбасы әрі партия Лидерінің бастамасына қолдау білдірген 10 мың қатысушының әрқайсысына шынайы алғысын білдірді.
Қымбатты достар, сіздердің арқаларыңызда праймериз партиялық «әлеуметтік лифт» арқылы талантты да белсенді, ел тағдырына алаңдайтын азаматтарды жауапты істерге араластырудың пәрменді құралына айналды. Мұнда ешкім де ұтылған жоқ. Бәрі де игілікке жетті. Әсіресе, еліміз үшін игі іс болды! Партиялық тізімдер бойынша сайлау жүйесін енгізу аясында біз бәріміз бірге елімізде жаңа саяси мәдениетті қалыптастыруға жол аштық.
Оң тәжірибені ескере отырып, партия Лидері Нұрсұлтан Назарбаев «Nur Otan»-ның Жарғысына партияның праймериз – партияішілік сайлауын өткізуі туралы норманы енгізуді тапсырды. Жарғыға енгізілетін өзгерістердің тиісті жобасы биылғы 25 қарашада өтетін партияның кезектен тыс ХХ Съезінің бекітуіне шығарылады.
Бұл ретте Елбасы бастамашылық еткен «Сенім. Диалог. Болашаққа нық қадам» партияны «қайта жандандыру бағдарламасы өз тиімділігін көрсеткенін нақты айтуға болады.