Түркістан облысы әкімінің орынбасары Ұлан Тәжібаевтың төрағалығымен мүгедектерді әлеуметтік қорғау саласындағы үйлестіру кеңесінің кезекті отырысы өтті. Мәжілісте үйлестіру кеңесінің мүшелерімен мүмкіндігі шектеулі азаматтарды әлеуметтік қолдау шаралары мен қолжетімді орта құру мәселесі қаралды, деп хабарлайды
Newsroom+Ақпарат агенттігі Түркістан облысының Өңірлік коммуникациялар қызметіне сілтеме жасап.
Бүгінгі таңда облыста 94,9 мың мүмкіндігі шектеулі азамат тұрады. Олардың ішінде 23,4 мыңында тірек-қимыл аппараты бұзылған, 11,7 мың азаматта ментальді функциялары бұзылған, ал 15,3 мың азамат көру және есту бойынша мүгедектер. Өңірлік коммуникациялар қызметінен мәлім еткендей, 2020 жылдың қаңтар айынан бастап мүгедектердің қызметтерді оңтайлы пайдалануына жағдай жасау мақсатында әлеуметтік қызметтер порталы енгізілген. Портал арқылы мүгедектігі бар тұлғалар өздерінің жеке қажеттіліктеріне сүйене отырып, оңалту құралдары мен қызметтерін өздері таңдайтын болады.
Сонымен қатар, еңбекке қабілетті мүгедектерді жұмыспен қамту мәселесі бойынша Түркістан облысы Жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева атқарылған жұмыстарға тоқталып өтті. Оның айтуынша, «Еңбек» мемлекеттік бағдарламасымен облыста жыл басынан 1152 мүгедектігі бар адам жұмыспен қамтылған. Олардың ішінен 332 адам тұрақты жұмысқа, 820 адам уақытша жұмысқа орналасты. Алдағы уақытта мүгедектігі бар азаматтарға әлеуметтік қолдау үшін бюджеттен бөлінген 4,6 млрд теңгеге оларды 37 324 көмекші құралдармен және әлеуметтік қызметтермен қамту күтілуде.
