«Ештеңе болмайды, өзіміз жауап береміз» деп жұртты тойхана иелерінің өздері азғырып отыр

Карантиндегі бассыздықтардың барлығына өздерінің қалтасын ойлайтын кәсіпкерлер, нақты айтар болсақ, тойхана иелері кінәлі. Күресті алдымен солардан бастау керек, дейді журналист Оралхан Дәуіт. Журналист бұл туралы Facebook парақшасында жазба жариялады, деп хабарлайды Newsroom+Ақпарат агенттігі.

«Карантин кезінде тойдың тоқтамай тұруына ең алдымен тойхана иелері кінәлі. Егер олар ешқандай тапсырыс қабылдамаса, той істеушілерді жолатпаса, ешкім тойханаға басып кіріп, той жасамайтыны анық. Яғни «ештеңе болмайды, өзіміз жауап береміз» деп той жасаушыларды қайта тойхана иелері азғырып отыр. Әйтпесе, кез-келген қуаныш иесі қазір талаптың қатал екенін біліп, үлкен дастархан жаюға жүрексінеді. Сол күпті болып тұрған көңілді тойхана иелері тарқатып жібереді ғой. Сондықтан бұлақты басынан тұндырып, той істеген қауымнан бөлек, тойхана иелерін тырп еткізбеу керек. Бұл өз ойым...», - дейді ол.