Мемлекет басшысы жұрттың көкейінде жүрген күдікті сейілтті

Еліміздегі ұлттық және мемлекеттік жоғары оқу орындары сатылмайтын болды. Бұл туралы президент Қасым-Жомарт Тоқаев Ұлттық қоғамдық сенім кеңесінің төртінші отырысында айтты, деп хабарлайды Newsroom+Ақпарат агенттігі. Мемлекет басшысы қазіргі кезде жоғары оқу орындарының құрылымын өзгерту жұмыстары жүргізіліп жатқанын мәлімдеді.

«Көптеген ЖОО коммерциялық емес акционерлік қоғамға айналды. Бұл ел ішінде әртүрлі әңгіме туғызуда. Сондай-ақ ірі мемлекеттік жоғары оқу орындары кейіннен жекеменшікке сатылуы мүмкін деген де күдік бар. Осыған орай ұлттық және мемлекеттік жоғары оқу орындары сатылмайтыны жөнінде мәлімдеймін», - деді президент.

Сонымен қатар мемлекет басшысы бұл мәселенің айрықша назарда екенін айтып өтті.