Жетім балалар мен күміс алқа иегерлеріне 1 миллион теңгенің сертификаты беріледі

Нұр-Сұлтан қаласының әкімі Алтай Көлгінов тұрғын үй сертификатын алатын адамдардың саны артатынын айтты, деп хабарлайды Newsroom+Ақпарат агенттігі. Бұрын тізімде: толық емес; көпбалалы; мүгедек бала бағып отырған отбасылар болса, қазір тізімге халықтың әлеуметтік аз қамтылған санаттарының бәрін қосылады. Биыл жетім балалар да бұл тізімге кірмек.

Азаматтарды қабылдау кезінде жиі көтерілетін мәселенің бірі – баспана. Пәтер алу жолдарын қарастыруды өтінген асыраушысы жоқ балалармен бірнеше рет кездестім. Санатты кеңейту құжатының жоспарын мәслихаттың алдағы сессиясына қарауға береміз. Құқықтық-нормативтік процедуралар аяқталған соң, сертфикат алушылар санатының жаңа тізімін бекітеміз. Тұрғын үй сертфикатының мөлшері – 1 млн теңге. Оларды «Шаңырақ» (5-10-20) жобасына қолдануға да болады",- деп жазды елорда әкімі өз facebook парақшасында.

Жаңа тізімге енетіндер:

1. жетім балалар;
2. I және II топ мүгедектері;
3. зейнеткерлер;
4. ҰОС ардагерлері және соларға теңестірілгендер;
5. мемлекеттік, қоғамдық немесе әскери тапсырма орындау кезінде қаза болғандардың отбасылары;
6. табиғи немесе техногендік ТЖ кезінде  баспанасынан айырылғандар;
7. бөтен елдердің аумағында ұрысқа қатысқандар;
8. «Алтын алқа»,
9. «Күміс алқа» иегері немесе ертеде «Батыр ана» атағын алған көпбалалы аналар;
10. I және II дәрежелі «Ана даңқы» орденімен марапатталғандар;
11. көпбалалы отбасылар кіреді. Әкімнің айтуынша, мемлекет Басшысының тапсырмасымен қолжетімді баспана құрылысы үш есеге ұлғайған.