Түркістан облысында праймеризге түрлі сала өкілдері өтініш беріп жатыр. Ауыл-аймақтарда да бұл саяси қадамға қызығушылық жоғары. «Nur Otan» партиясы Отырар аудандық филиалына көпбалалы ана арнайы келіп, праймеризге қатысуға өтініш берді, - деп хабарлайды Newsroom+Ақпарат агенттігі «Nur otan» партиясы Түркістан облыстық филиалының баспасөз қызметіне сілтеме жасап.
Күзенбаева Жұмагүл Абдушамитқызы 1986 жылы дүниеге келген. Бұл үміткер – 7 баланың анасы және «Алтын алқа» иегері. «Nur Otan» партиясының мүшесі. Көпбалалы ана жеке кәсіпкерлікпен айналысады. «Бизнес бастау» бағдарламасы арқылы грант ұтып алып, Шәуілдір ауылында сұлулық салонын ашқан. Бүгінде Жұмагүл 7 қыз-келіншекті тұрақты жұмыспен қамтып отыр. «Талапты» бастауыш партия ұйымы атынан ұсынылған үміткердің жоспарлары аз емес.
Ойлана келе «Nur Otan» партиясының праймеризіне қатысуды жөн көрдім. Құжаттарымды өткіздім. Бұл – әр азамат үшін қоғамдық-саяси өмірге араласуға үлкен мүмкіндік. Праймеризден өтіп, депутат болсам, көпбалалы аналардың құқығын қорғап, оларға қолдан келгенше жағдай жасағым келеді. Өз замандастарымның, ардақты аналардың мәселелерін жақсы білемін, – дейді Жұмагүл Күзенбаева.Жалпы Түркістан облысында бір аптада 500-ден астам үміткер өтініш тапсырды. Тұрғындардың белсенділігі жақсы. Партияның осы өңірдегі 80 мыңнан астам мүшесі өзара үздіктерді анықтап, кадрлық резерв жасақталады.