Мүгедек қызын ит қорлықта ұстаған әйел сот алдында жауап бергелі жатыр

15 Қаңтар, 2019 633 0

Алматыда мүгедек қызын ит қорлықта ұстап келген Анна Иванованың ісі сотқа түсті, деп хабарлайды ҚазАқпарат тілшісі.

13 жастағы Диана Иванованың туған анасы Анна Ивановаға бірнеше бап бойынша айып тағылған. Әйел адам кәмелеттік жасқа толмаған баланың денсаулығына қасақана зақым келтіргені, бала тәрбиелеуде міндетін дұрыс атқармағаны үшін жауап береді.  

«Іс сотқа түсті. Қылмыстық істі Алматы кәмелеттік жасқа толмағандардың ісі бойынша мамандандырылған ауданаралық сот қарайтын болады. Процесс жабық режімде өтеді. Сот алдында қыздың анасы Анна Иванова жауап береді», - деді баспасөз қызметінен. 

13 жастағы мүгедек қыз Диананың жағдайы бүкіл елді шошытқан болатын. Анасы оны 3 жыл бойы далаға шығармай, байлап ұстаған.  Баланың адам төзгісіз жағдай өмір сүріп жатқанын көрген  Қапшағай тұрғыны Надежда Барсукова 2017 жылдың 17 тамызында Надежда Барсукова Аннаны көндіріп,оны сенімхатпен қамқорлығына 3 жылға алып кеткен. 

Содан бері жас қыз жаңа отбасына үйреніп келеді.Қазір Диананың әке-шешесі, екі інісі бар.  

Сал ауруымен ауыратын Диананың оң жақ қолы мен аяғында гемипарез байқалады. Құлағы кесілген, қол-аяғы, мұрны сынған. Тістері түсіп қалған.  Аузында қоянжырық сияқты ақауы бар. 

«Бастапқы үш айда түнімен шыңғырып, жылап шығатын. Психикасы аса ауыр зақым алған еді. Қазір де кейде бірнәрсеге жұмсасаң, ұмытып қайтып келеді немесе қайда тұрғанын ұмытып қалады. Бізге осы тығырықтан шығу үшін 1 жыл психологпен жұмыс істеуге тура келді. Баламның психикасы орнына келді», - дейді Н. Барсукова.  

Диагнозының ауырлығына байланысты Диана мектепке бармайды, оны жергілікті мектептен  мұғалімдер келіп оқытып жүр.

Тегтер: оқиға, Алматы, мүгедек, іс, сот

Достар! Біздің телеграмма арнамызға жазылыңыздар және соңғы жаңалықтарды бірінші болып біліп отырыңыз. Жаңалықтар Сізге дереу жетеді!

Пікір қалдыру

Пікір жазу үшін сайтқа кіріп, телефон нөмірін растаңыз.