Атырауда журналистер ұсталды - телеарна ресми мәлімдеме жасады

11 сәуірде телеарнаның Атырау облысындағы тілшілерінің түсірілім тобы жергілікті облыстық ауруханадағы оқиға туралы репортаж түсіруге шыққан. Медициналық мекеме қызметкерлері – дәрігерлер мен медбикелердің мәлімдеуінше, оларды Махамбет ауданындағы туберкулезден емдейтін бұрынғы диспансердің ғимаратына карантинге жібермек болған. Дәрігерлер басшылықтан нақты жауап ала алмаған соң, барлық түйткілдерін республикалық телеарна эфирінде айтпақшы болған. Оқиға орнына жеткен арнаның меншікті тілшісі мен телеоператоры аурухананың ауласына еш кедергісіз кірген. "Сол жерге бір топ медицина қызметкерлері жиналды. Медициналық мекеменің аумағына өтуге журналистерді сол жерде болған бірде-бір күзет,  ішкі істер органдарының қызметкерлері тоқтатпаған. Сондай-ақ,  аурухана ауласының жабық карантиндік аймақ екенін куәландыратын ешбір қоршау, ескерту белгілері болмаған", - деп жазылған мәлімдемеде. Журналистерінің кәсіби қызметін жүзеге асыруға қажетті журналистік куәлігі, жұмыс орнынан анықтамасы және төтенше жағдай режимі кезеңіндегі редакция тапсырмалары өзімен бірге болғаны айтылады. Оқиға орнына келген полиция қызметкерлері журналистер карантиндік аймаққа заңсыз кіргенін айтып, түсініктеме беруге полиция департаментіне алып кеткен. Ал дәрігерлер мен медбикелер бұған қатты ашуланып, полиция қызметкерлерінен түсініктеме талап етеді.