Қазақстандық әнші Данэлия Тулешова America's Got Talent шоуының жартылай финалына өтті. Бұл туралы ол өзінің instagram-дағы парақшасында жазды, деп хабарлайды
Newsroom+ақпарат агенттігі. «Келесі кезеңге өткеніме сене алар емеспін. Сіздерге айтар алғысым шексіз. Жартылай финалда сенімдеріңізді ақтау үшін барымды саламын. Дауыс берген әрбір жанға рақмет! Сіздерді жақсы көремін және өте бақыттымын!» – деді әнші.
Жобаның ширек финалында жерлесіміз Гарри Стайлстың Sign of the Times әнін орындаған болатын. America’s Got Talent шоуының 15-маусымында әділқазы алқасына жоба негізін қалаушысы әрі продюсері Саймон Коуэлл, актриса София Вергара, сән әлемінің жұлдызы Хайди Клум мен әзілкеш Хоуи Мэндел енген. Ал жүргізушісі – Терри Крюс. Танымал шоудың 15-маусымы 26 мамырда NBC телеарнасында басталды, ал 29 мамырдан бастап Netflix UK көрсетуде.
Данэлия жобаның алғашқы турында канадалық әнші Faouzia-ның Tears of Gold әнін орындаған болатын.
