Түркістан: Қазақстанда тұңғыш рет Шәмші Қалдаяқов музейі ашылды

Түркістан облысының Отырар ауданында туып-өсіп, «қазақ вальсінің королі» атанған Шәмші Қалдаяқовқа туған жерінде музей ашылды. Аталған шара Ұлы композитордың 90 жылдық мерейтойына арналды, - деп хабарлайды NewsRoom+ Ақпарат тілшісі Түркістан облысы өңірлік коммуникациялар қызметіне сілтеме жасап. Қазақ руханияты үшін елеулі мерекеге ҚР мәдениет және спорт министрі Ақтоты Райымқұлова және облыс басшысы Өмірзақ Шөкеев арнайы келіп, музеймен танысты «Шәмші Қалдаяқов - қалың қазақтың шексіз сүйіспеншілігіне бөленген, ұлттық əн өнерінде айрықша із қалдырған сері сазгер, қазақ вальсінің королі. Дүйім жұрт мойындаған бірегей өнер иесі - Егемендігіміздің айбары саналатын əнұран музыкасының авторы. Сыршыл сезімге құрылған лирикалық әсем туындылар келешекте де халықпен бірге мәңгі жасай берсін», - деді А. Райымқұлова. «Бүгін айтулы мереке. Шәмші Қалдаяқовтың туғанына 90 жыл толып отыр. Алайда, осы облысқа келгелі Шәмшінің кіндік қаны тамған жерде Шәмшіге арналған музейдің жоқ екенін білдім. Тіпті біздің бүкіл республикада «Қазақ вальсінің короліне» арналған бірде-бір музей жоқ. Аз уақыт ішінде кеткен кемшіліктің орнын толтыру үшін тапсырма беріп, демеушілер есебінен Шәмші музейінің ашылуын қолға алдық. Шәмші музейі – Жидебайдағы Абай музейі секілді жас композиторлар мен жас әншілер тәу ететін зиярат орнына айналуы тиіс», деді Өмірзақ Шөкеев. Атап өтейік, бұл нысан Шәмшінің көзін көрген, оның өміріне қанық азаматтар естелігін есепке ала отырып салынды. Музей ішінде Ұлы композитордың өзі қолданған бұйымдары, саз шығаруға сеп болған мандолинасы секілді құнды жәдігерлер бар. ҚР Ұлттық Музейі Шәмшінің жаңадан ашылған музейіне композитордың бас киімін әкеліп тарту етті. Шәмші мұрағатын күтіп-баптау үшін мекеме облыстық музейдің филиалы ретінде ашылып, арнайы штат санымен мамандары жұмыс істейтін болады. Келген туристер мен қонақтарға барлық жағдай жасалады. Өскелең ұрпаққа Шәмшіні насихаттау жұмыстары мұнымен тоқтап қалмайды. Ең алдымен облыс орталығындағы жаңа музыка мектебіне Шәмші Қалдаяқов есімі берілсе, музыка мектебінің алдында еңселі ескерткіші бой көтереді. Сондай-ақ, Түркістан қаласындағы көшелердің бірі сазгер есімімен аталады.