Ұлы Абайдың еңбектері енді армян тілінде басылмақ

Абайтану. Бас ақынның 175 жылдығы аясында қазақ ойшылының еңбегіне Арменияда да қызығушылық арта түскен.Бұл туралы  «Хабар 24» арнасына Newsroom+Ақпарат агенттігі сілтеме жасап хабарлайды. Биыл Абайдың көптеген еңбегі тұңғыш рет армян тіліне аударылып, кітап болып басылмақшы. Ол ғылыми және студенттік ортаға және барлық оқырмандар үшін құнды оқу құралы болады дейді мамандар. Цовинар Костанян Абай Құнанбайұлының шығармасын жатқа айтып жүр. Қазақ ойшылының кітабын алғаш қолға алған сәттен бастап ұлы ақын оның ең сүйікті авторына айналыпты. Цовинар Костанян, саясаткер:

– Абайдың шығармалары жалпы адамзатқа ортақ құндылық тұнып тұр. Екі ғасыр бұрын жазылған еңбек қазірге дейін өзектілігін жоймаған. Ұрпақ тәрбиесі, жақсылыққа қарай қалай бет түзуіміз керектігін осы қазық ойшылының қаламынан төгілген еңбектерден табамыз.

Ал журналист Нарине Эйрамджянц:

 – Абайдың қара сөздерінен ақынның адамды, өмірді терең танығандығын сезесің. Оның еңбектері бүгінге дейін өміршеңдігін жоймаған. Қазір Абай мұрасымен кеңінен танысу арқылы біздің ұтарымыз көп. Дұрыс өмір сүру, басты құндылықтар, әлем халқы жиі бас қатыратын осы сұрақтарға ақынның шығармаларынан жауап аламыз.

Нарине Эйрамджянцтің Абай шығармасын зерттеп жүргеніне 15 жыл болыпты. Ол Абайдың мәдени мұрасы кез келген ортада насихаттаумыз тиіс, әлемдік деңгейдегі құндылықтар дейді.