30 минуттық өнері үшін 10 мың доллар алатын әншілер де 42500-ге өтінім беруде
30 минуттық өнері үшін 10 мың доллар алатын әншілер де 42500-ге өтінім беруде
Үкіметтің жәрдемақысына әркімнің ақ бар таласы. Мейлі ол айлығы шайлығынан артылмайтын отбасы болсын, не концерті мен тойы тоқтаған өнер адамдары болсын, бәрі 42 500 теңгеге қарап отыр. Өйткені бұл төлем табысынан қағылғандарға тиесілі. Рас. Алайда 30 минуттық өнері үшін 10 мың долларлап олжа табатын жұлдыздардың әлеуметтік жәрдемақыға жармасқаны қара халықтың ашуына тиіп отыр. Өйткені кей шын мұқтаж адамдардың өзі үкіметтің 42 мың теңгесіне қол жеткізе алмай отыр. Сонымен әлеуметтік төлемді алған әншілер кім? Бұл туралы Еуразия бірінші арнасына Newsroom+Ақпарат агенттігі хабарлайды.
«Аш қалатын болдық» деп билікке алғашқылардың бірі болып өтініш айтқан әнші Бүркіт еді. Карантин тоқтамаса халық вирустан емес, аштан өлетін болды деп ренішін білдірген болатын. Ал арада бір күн өткен соң, мәдениет министрі Ақтоты Райымқұлова оған осындай жауап қатқаны әлі есте.
АҚТОТЫ РАЙЫМҚҰЛОВА, ҚР МӘДЕНИЕТ ЖӘНЕ СПОРТ МИНИСТРІ:
«Біздің мемлекетіміз әр түрлі жеңілдіктерді ұсынып отыр. Сондықтан біздің әртістеріміз де, егер өздерінің күнделікті табыстарынан айырылып жатса, әрине мемлекеттің ұсынып жатқан әр түрлі ұсыныстарға олардың да қатысуына мүмкіндік бар.»
Міне, қызықтың көкесі де осыдан басталды. Тойы тоқтап, жалғыз табысынан қағылған жұлдыздар да үкіметтің жәрдемақысына таласа бастады. Қатарында, танымал әнші Қарақат Әбілдина, көптеген хит әнімен танымал болған әнші Бағлан Әбдірайымов, сазгер Сара Жүнісбек, "Алашұлы" тобының экс-әншісі Әзімбек Байлин мен өнердегі басқа да әріптестері бар. Карантинде жұмыссыз қалған әнші әрі актер Дидар Кәденге де 42 500 теңге кәдесіне жарапты. Одан бөлек Серікбол Сайлаубек, танымал рөлдерімен көрерменнің сүйіспеншілігіне бөленген актер Дәурен Айдарқұлов та бір реттік төлем алғандардың тізімінде. Қызығы жәрдемақы алған жұлдыздардың қарасы мұнымен бітпейді.
ЕРЛАН МАЛАЕВ, «БӘЙТЕРЕК» ТОБЫНЫҢ ӘНШІСІ:
«Бір күнде қанша ақша кетеді, соны 3-4 айға бөліп тастасаң, біраз өнер адамдарының жағдайы нашарлап қалды. Сондықтан ешқандай ұялмай ақ үкіметтің берген көмегін көру керек олар да. Сондықтан оның ешқандай ыңғайсыздығы жоқ деп ойлаймын.»ЕЛЕНА КУЗНЕЦОВА, ҚАЛА ТҰРҒЫНЫ:
«Мен 42 500 теңгені алуға бірнеше рет өтініш бергеніммен маған 42500 төлеуден бас тартты. Өйткені декреттегі аналар алмайды-мыс. Карантин кезінде жұмысынан айырылған күйеуіме де ештеңе төленбеді. Сонда біз қалай жан бағуымыз керек? Жәрдемақыны шынымен мұқтаж адамдар алмаса, 42500 теңге кімдерге беріліп жатыр сонда?»ТҰРАР САТТАРҚЫЗЫ, ҚОҒАМ БЕЛСЕНДІСІ:
«Шын мұқтаж адамның қазанына қол салу деп білем мен шын айтқанда. Мұқтаж адам ала алмай қалған, бірақ әншілердің алуы мен үшін ұят сияқты. Олардың бәрінің бір-бір басына керемет үйлері бар, бір-бір басында қанша көліктері бар, мақтанып инстаграмда түрлісін жазады, сөйтіп отырғанда халықтың асына қол сұғу ол дұрыс емес деп ойлаймын»Қысқасы, қоғам белсендісі Тұрар Саттарқызы әншілердің карантинде ақшасыз қалғандарына қанша айтса да сенбеймін дейді. Бұл ретте, Мұзарт тобының әншісі Мейрамбек Беспаевтың айтқаны еске түседі. Республикалық арналардың біріне берген сұхбатында әнші жәрдемақыға қарап қалғандарды барып тұрған жалқау деп еді. МЕЙРАМБЕК БЕСПАЕВ, ӘНШІ:
«Көмекті сұрап жатқан тек қана қазақ. Оны мен бір жағынан бұл жерде жалқаулық бар деп ойладым бір шеті. Қанымызда бар. Менің өзімнің маңайымда да інілерім, туыстарым - жалқау. 42 500-ге қырылып қалған басқа халықты көрген жоқпын».Сондай-ақ көптің көңілін күпті еткен тағы бір мәселе бар. Шетелде өнер жұлдыздары биліктен ақша сұрамақ түгілі, керісінше пандемия кезінде халыққа қолдан келгенше қолдау білдіруге тырысты. Бірі ақшалай, өзгесі материалдық көмек берді. Ал біздегі жұлдыздардың жәрдемақыға қол сұққаны барып тұрған ұят дейді қоғам белсенділері.