Белгілі дизайнер Берік Исмаилов қайтыс болды

Танымал дизайнер Берік Исмаилов көз жұмды. Қаралы хабарды ҚР Сенат депутаты, тележүргізуші Дана Нұржігіт әлеуметтік желіде естіртті.

«Коронавирус елімізге қауіп төндірген алғашқы күннен-ақ тегін маска тігіп таратып, бүкіл шәкірттерін сол жұмысқа жұмылдырған патриот, тамаша дизайнер, елгезек жан Берік Исмаилов ағамызды да сұм ажал, беті жаман індет арамыздан алып кетті. Екі жылдай бұрын жүрегіне ота жасатып, ауыр кеселді жеңіп, қатарға қосылып, әдетінше еңбекқор адамның тынымсыз тіршілігіне кірісіп кеткен еді. Қаншама өнерпазға костюм тігіп, қаншама адамды тігіншілік өнерге баулып, шәкірт тәрбиелеген ұстаз едіңіз! Нарықтың тілін меңгерген нағыз іскер азамат еді! Алматының Әуезов пен Тимирязев көшелерін Беріктің шеберханасынсыз елестету, әсте, мүмкін емес еді! Сол көшенің жарқыраған шамы өшкендей бүгін... Бақұл болыңыз, Жақсы Адам!», - деп жазды Д. Нұржігіт өзінің Instagram-парақшасында.

Берік Исмаилов танымал әнші Димаш Құдайбергеннің «Славянский базар» байқауында киген сахналық киімдерін тігіп берген. Ол өмірінің соңғы 24 жылын осы салаға арнаған еді.