Түркия Сириямен шекарадағы әскери әлеуетін күшейте бастады

24 Желтоқсан, 2018 515 0

АҚШ президенті Дональд Трамп Сириядағы америкалық әскерилерді шығару жоспарын жариялаған соң Түркия Сириямен шекарадағы әскери әлеуетін күшейте бастады. Шекараны күшейту шаралары Түркия президенті Режеп Тайып Ердоған 23 желтоқсан күні Дональд Трамппен телефонмен сөйлескеннен кейін басталды. Екі ел басшылары Сириядан АҚШ әскері шығарылған соң бұл елде күштердің тепе-теңдігі сақталып тұруы үшін әскери және дипломатиялық іс-қимылдарын үйлестіріп отыруға келісті.

Reuters агенттігінің куәгерлерге сілтеме жасап хабарлауынша, түркиялық жүздеген әскери көлік Түркияның Хатай провинциясынан оңтүстіктегі Сириямен шекаралас Килис провинциясына қарай жолға шыққан.

Түркияның IHA ақпарат агенттігі түркиялық әскери техникалар легі 23 желтоқсанға қараған түні Сирия шекарасынан өткенін хабарлады.

Түркия әскери басшылығы әскери техникалардың Сирияға өткені туралы ақпаратқа түсінік бермеді.

АҚШ президенті Дональд Трамп Twitter-дегі парақшасында Ердоғанмен бірге «Сириядағы АҚШ әскерін біртіндеп және өзара келісе отырып шығару» жайын талқылағанын жазды.

АҚШ әскері Сирияда күрдтердің арнайы пешмерга жасақтарымен бірге «Ислам мемлекеті» экстремистік ұйымы содырларымен соғысып жатқан. Анкара пешмерга жасақтарын Түркия аумағында астыртын күрес жүргізіп отырған күрд бүлікшілерінің «террорлық қанаты» деп сипаттайды.

Дональд Трамп 19 желтоқсан күні Сирияда «Ислам мемлекеті» экстремистік тобына қарсы соғыстағы «тарихи жеңістен кейін» барлық америкалық әскерилер «отанына қайтатынын» мәлімдеген.

Тегтер: Түркия, Сирия, әскер, шекара, соғыс

Достар! Біздің телеграмма арнамызға жазылыңыздар және соңғы жаңалықтарды бірінші болып біліп отырыңыз. Жаңалықтар Сізге дереу жетеді!

Пікір қалдыру

Пікір жазу үшін сайтқа кіріп, телефон нөмірін растаңыз.